Эдебий дюньясы халкъынен сыкъы багълы

Языджы, публицист Айдер Османнынъ 75 йыллыгъы мунасебетинен

31-январь куню И. Гаспринский адына миллий китапханемизде, отькерильген « Ильхам» клубынынъ фаалиети белли языджы, публицист, терджиман Айдер Oсманнынъ 75 йыллыгъына багъышланды.

Айдер Осман 1938 сенеси 1 -январьда Къырымнынъ Сеитлер районы Бешкъурткъа-Вакъуф коюнде дюньягъа кельди. Сюргюнликте Фергъана виляети Алтыарыкъ къасабасында яшады. Мектепни битирген сонъ, Маргьылан оджалар техникумында окъуды. Ордуда хызмет эткенде арбий хаберджилер курсларыны кечти ве газетлерге макъалелер язды. Къайткъан сонъ, Ташкент Девлет университетининъ журналистика болюгини битирди.

О, «Ленин байрагьы» газетинде мудир, «Иылдыз» меджмуасында баш муаррир олып чалышты. Онынъ «Эмджемден селям» очерклер джыйынтыгьы, «Таныш козьлер», «Йыллар ве достлар», «Осюв басамакълары», «Тутушув» икяелер ве повестьлер джыйынтыкълары нешир этильди. Ватанымызгьа къайткъан сонъ, «Йылдыз» меджмуасында онынъ «Агент», «Къайтув» адлы повестьлери ве бир сыра икяелери басылды.

Тедбирде языджылар, оджалар, эдипнинъ сойлары ве якъын достлары, матбуат хадимлери ве. эльбетте де, «Ильхам» клубынынъ азалары булундылар.

И. Гаспринский адына китапхане мудир муавини Лиля Къадырова бу кучюк даиреде отькерильген тедбирде, джумледен, бойле деди:

—Айдер Османгьа багъышлангьан тедбир, эльбетте де, буюк залларда отькерильмеге ляйыкъ. Биз, китапхане хадимлери озь имкянымыздан файдаланыл, онынъ 75 йыллыгъыны окъув залымызда отькермеге къарар эттик. Бунъа «Ильхам» клубы, языджылар къолтуттылар.

Мен шуны айтмакъ истейим ки, Айдер Османнынъ язгъан эсерлери энди чокътан дюнья юзюни корьди ве бильгениме коре, звде онынъ архиви ёкъ. Бунъа бакъмадан, А. Османнынъ 75 йыллыгъы мунасебетинен китапханемизнинъ хадими Диляра ханым онынъ акъкъында «Айдер Османнынъ эдебий дюньясы» адлы рисале чыкъарды. Анда языджынынъ къайда насыл эсерлер язгьаны акъкъында ве онынъ акъкъында язылгьан шейлер боюнджа малюматлар берильди, эм де дигер ерлерде дердж этильмеген онынъ акъкъында язылгьан эсерлер кирсетильди.

Тедбирде языджылар Шерьян Али, Риза Фазыл, Урие Эдемова, Аблязиз Велиев, «Йылдыз» меджмуасынынъ муаррири Дилявер Осман, миллий арекет ветераны Арсен Альчиков, КъМПУ къырымтатар ве тюрк тильшынаслыкъ кафедрасынынъ оджапчеси Лиля Асанова, ТМУ эдебият кафедрасынынъ оджасы Шевкет Юнусов, йырджы Рустем Меметов, языджынынъ аптеси Ремзие Османова ве дигерлери чыкъышта булундылар.

Тедбирни яраштырып, Рустем Меметов «Байдар къаранфили» йырыны иджра этти. Ремзие апте къардашына багьышлап отькерильген бойле хатыра акъшамы ичюн тешкилятчыларгьа ве кельгенлерге озь тешеккюрини бильдирди.

Тедбирнинъ сонъунда Шерьян Али Айдер Османнынъ «Сайлама эсерлер» китабыны чыкъармакъны теклиф этти.

                                                                    Наджие АМЕТОВА.