Къарасувбазарда Бекир Чобан-заде адына халкъара мукяфат такъдим этильди

Июнь 20 куню Кьарасувбазар шеэрннде Бекир Чобан-заде адына халкъара мукяфатнынъ такъдим мерасими отькерильди. Тантаналы тедбирде Кьарасувбазар шеэрининъ башы Альберт Кангиев, Миллий Меджлиснинъ реиси Рефат Чубаров, Къырым парламенти реисининъ муавини Ремзи Ильясов, АТР телеканалынынъ баш директоры Эльзара Ислямова, Къырымтатар Языджылары бирлигининъ реиси Риза Фа- зыл сёзге чыкъып, мукяфат гъалиплерини хайырладылар. Олар Бекир Чобан-заде адына фонднынъ япкъан ишлерине де юксек къыймет кестилер.

Бу фонднынъ ве мукяфатнынъ тэсисчиси, иш адамы Ресуль Велиляев чыкъышта булунаракъ, Бекир Чобанзаде адына мукяфатнынъ такъдим мерасими, адеттеки киби, майыс айына къарарлаштырылса да, Къырымда олып кечкен вакъиалардан себеп, тедбирни июнь айына къалдырмагъа меджбур олгъаныны бильдирди.

— 2006 сенеси тэсис этильген халкъара мукяфатымыз энди секизинджи кере такъдим этиле. Бу вакъыткъадже 30-гъа якъын адам мукяфатнен такъдирленди. Бу йыл да Бекир Чобан-задеге багъышлап, ильмий конференцияны кечирмеге, шеэрге бир чокъ алимлерни давет этмеге истедик. Амма, языкъ ки, бу сефер тек эдебий окъувлар кечире бильдик. Иншалла, келеджек йыл буюк планларымыз-гъа кимсе ве ич бир шей кедер этмез. — деди Р. Велиляев.

Бу йылки мукяфат «Бекир Чобан- заде. Библиографик косьтергич»ни азырлагъан И. Гаспринский адына джумхуриет кутюпханесининъ етекчи библиографы Зарема Ислямовагъа эм де «Литва татарлары — тарихта ве медениетте» китабынынъ муэллифлери — Адас Якубаускас, Галим Ситдиков ве Станислав Думинге такъдим этильди. Бунынъ киби де, Бекир Чобан-заденинъ аяты ве иджадыны популярлаштыргъаны ичюн «Янъы дюнья» газетасы ве яш тедкъикъатчы Лиля Меметова махсус дипломларнен такъдирлендилер.

 

Тедбирде мукяфатнынъ лауреаты, белли рессам Рустем Эминов озюнинъ «Бекир Чобан-заде» портретини фондгъа багъышлады. Сёз устасы Риза Юсуф Бекир Чобан-заденинъ шиирлерини окъуды. Намлы артистлер Рустем Меметов ве Эдип Багъчасарайлы, яш йырджылар Эмине Мустафаева ве Марлен Каримов озь йырларыны иджра эттилер. «Джемиле» ансамбли озь оюнларынен эр кесни хошнут къалдырды.

Сейран СУЛЕЙМАН

 // Янъы дюнья. — 2014. — 27 июнь — с.8