Окъумагъа теклиф этемиз: Кузь (Предлагаем почитать: Осень)

Алтын кузь кельди. Орман ве дагълар, багъ-багъчалар, бостанлар кузь япынджасы астына гизленди. Къушлар сыджакъ улькеге учып кеттилер.

Урьметли балачыкълар, биз сизге кузь акъкъында шиирлерни такъдим этемиз.

Кузь

Тез етишти ягъмурлы кузь,
Кете дерске балалар.
Ягъмур ягъа гедже-кундюз,
Энди сувуй авалар.
Кузь кельди, эм тереклернинъ
Япракълары тёкульди.
Тарлаларда тютюнлер де,
Бостанлар да сёкюльди.
Не къарылгъач авелене,
Не турналар ойнайлар,
Не чибин бар къораларда,
Не чиркийлер къайнайлар.

Осман Амит

Кузь кельгенде…

Кузь кельгенде эсе еллер,
Сыкъ-сыкъ ягъа ягъмурлар.
Дерелерден акъа селлер,
Тёкюлелер япракълар.
Сарардылар багъ-багъчалар,
Учып кетти турналар.
Бизнен къалды бозторгъайлар,
Чавкелер ве къаргъалар.

Фикрет Самединов

Кузь айында

Алтын кунеш сакълана
Булутларнынъ артына,
Коклер куськен, ер кульмей,
Къушчыкълар эп агълана.
Еллер эсе, дувулдай,
Япракъларны къувалай,
Къачышсалар япракълар,
Ель оларны обалай.
Ачувлангъан озенлер,
Дагълар даргъын гурьлейлер.
Буз булуллар коклерде :
«Ягъмур келе, къач!», — дейлер.

Абибулла Одабаш

Кузь бахшышы

Кузь етишти юртума,
Бош кельмеди къапума.
Сепет-сепет мейвалар
Бизге бере багъчалар.
Темизлене тарлалар,
Себзе тола анбарлар.
Бизге бойле бахшышлар
Кузь кетире, балалар.
Этраф бенъзер масалгъа :
Инсанны айрет алгъа
Къоя кузьнинъ юрюши,
Бакъышы ве кулюши.

Бахшыш Эльмаз

Кузь левхалары

Кузь де кельди, чырай сытып,
Беклеттирмей озюни,
Хафиф танъ еллерин къытып,
Сарартып ер юзюни.
Кунеш сыкъ-сыкъ козюн сюзе,
Я юкъусы келеми?
Я ки бир кейфсизлик сезе?
Неге, аджеп, элеми?…
Сакъланмачакъ ойнагъандай,
Булутларгъа бурюне,
Сабан сюрип ёрулгъандай,
Шенъленмеге эрине…
Шай олса да, сездирмей о,
Кулюмсирей кимерде…
Ягъмур, сыкъ-сыкъ язма язып,
Бояй акъкъан сувларны.
Рессам – къырав, борнен язып,
Безендире къырларны.
Чёллер ешиль ёргъанларын
Денъиштирип къарагъа,
Гедже тюшкен туманларнен
Япыналар марама.

Ремзи Бурнаш