95 лет со дня рождения Ремзи Бурнаша (1920 – 1982), поэта, педагога
1920 с. июнь 17 куню Акъмесджит дживарындаки Тав Дайыр коюнде догъды. Бабасы Керим Бурнаш кой мектебинде оджалыкъ япа эди. Ремзиде ильк тасилини кой мектебинде алды. Мектепке бармаздан эвель эвлеринде ана бабасындан, къартларындан эшиткен эфсанелер ве риваетлер анда халкъ агъыз яратыджылыгъыны огренмеге авеслик догъурды.
О, кой мектебинден сонъ, Акъмесджитте 13-нджи орта мектебте окъуды. О девирде шаир Ибраим Бахшыш, орта мектепнинъ янында эдебият тёгереги тешкиль этип, истидатлы яшларны анда джельп этип эгитиме башлагъан эди. Ремзи шу тёгерекнинъ ильки иштиракчилеринден бири олды. Бираздан сонъ койдеши Джафер Гъафар ве Гъафар Булгъанакълынен якъын мунасебетте булунды. Олар Ремзиге яратыджылыкънынъ сырларыны огреттилер. Орта мектепни битирген сонъ, Ялтадаки оджалар техник мектебине кирди. Ниает, 1935 сенеси “Яш Ленинджилер” меджмуасында ильки шиирлери басылып чыкътылар. 1940 сенеси “Къызыл Къырым” газетасында яш шаирнинъ Выборг – совет шеэри, Солдат йыры киби шиирлери дердж олынды. 1941 сенесинде Алманларнынъ Къырымны ишгъалинден сонъ, Алманларгъа къаршы урушмалара къатылды. Чатышувларнынъ биринде яраланды. Ленинград хастанесинде тедавийленген сонъ, кене джебеге къайтты.
Шаир Экинджи Джиан дженкинде ШСДжБ ичюнъ бу къадар урушмасына рагъмен Къырымтатарларнынъ огърагъаны фена акъыбеттен къуртуламады. О да халкъынен сюргюнликке огърады.
Сюргюнде Наманган виляетининъ Хагулабад къасабасында булунгъан 57-нджи мектепте кене озюнинъ севимли ишини оджалыкъы япмагъа девам этти. Талебелерге Рус тили ве эдебияты дерси берди. 1952-1956 сенелери озь бильгисини теренлештирюв макъсадыненъ Саратов Университетининъ филология факультетинде окъуды.
1966 сенеси Гъафур Гъулам адына эдебият ве санат нешриятында Ремзи Бурнашнынъ шаирлерден Черкез Али ве Амет Метааевнен бирликте, энъ яхшы эсерлери сайланып дердж олунгъан Мавы саиллер шиирлер джыйынтыгъы чыкъты. Ондан сонъра окъуюджылар эдипнинъ Юрек сырлары (1970), Эдеп чокърагъы (1976), Майыс сабасы (1981) киби шиирлер джыйынтыкъларыны окъумагъа наиль олдылар.
Ремзи Бурнаш 1982 сенеси, къызчыгъы алты яшында экенде апансыздан вефат этти.
Remzi Burnaş (1920 – 1982) – belli Qırımtatar şairi.
1920 s. iyün 17 künü Aqmescit civarındaki Tav Dayır köyünde doğdı. Babası Kerim Burnaş köy mektebinde ocalıq yapa edi. Remzide ilk tasilini köy mektebinde aldı. Mektepke barmazdan evel evlerinde ana babasından, qartlarından eşitken efsaneler ve rivayetler anda halq ağız yaratıcılığını ögrenmege aveslik doğurdı.
O, köy mektebinden soñ, Aqmescitte 13-nci orta mektebte oqudı. O devirde şair İbraim Bahşış, orta mektepniñ yanında edebiyat tögeregi teşkil etip, istidatlı yaşlarnı anda celp etip egitime başlağan edi. Remzi şu tögerekniñ ilki iştirakçilerinden biri oldı. Birazdan soñ köydeşi Cafer Ğafar ve Ğafar Bulğanaqlınen yaqın munasebette bulundı. Olar Remzige yaratıcılıqnıñ sırlarını ögrettiler. Orta mektepni bitirgen soñ, Yaltadaki ocalar tehnik mektebine kirdi. Niayet, 1935 senesi “Yaş Leninciler” mecmuasında ilki şiirleri basılıp çıqtılar. 1940 senesi “Qızıl Qırım” gazetasında yaş şairniñ Vıborg – sovet şeeri, Soldat yırı kibi şiirleri derc olındı. 1941 senesinde Almanlarnıñ Qırımnı işğalinden soñ, Almanlarğa qarşı uruşmalara qatıldı. Çatışuvlarnıñ birinde yaralandı. Leningrad hastanesinde tedaviylengen soñ, kene cebege qayttı.
Şair Ekinci Cian cenkinde ŞSCB içüñ bu qadar uruşmasına rağmen Qırımtatarlarnıñ oğrağanı fena aqıbetten qurtulamadı. O da halqınen sürgünlikke oğradı.
Sürgünde Namangan vilâyetiniñ Hagulabad qasabasında bulunğan 57-nci mektepte kene özüniñ sevimli işini ocalıqı yapmağa devam etti. Talebelerge Rus tili ve edebiyatı dersi berdi. 1952-1956 seneleri öz bilgisini terenleştirüv maqsadıneñ Saratov Universitetiniñ filologiya fakultetinde oqudı.
1966 senesi Ğafur Ğulam adına edebiyat ve sanat neşriyatında Remzi Burnaşnıñ şairlerden Çerkez Ali ve Amet Metaayevnen birlikte, eñ yahşı eserleri saylanıp derc olunğan Mavı sailler şiirler cıyıntığı çıqtı. Ondan soñra oquyucılar edipniñ Yürek sırları (1970), Edep çoqrağı (1976), Mayıs sabası (1981) kibi şiirler cıyıntıqlarını oqumağa nail oldılar.
Remzi Burnaş 1982 senesi, qızçığı altı yaşında ekende apansızdan vefat etti.