Абселям Ислямов (1907 – 1995)

Абселям Ислямов 1907 сенеси апрель 1-де Къырымнынъ Къарасувбазар районы Тогъай-Вакъуф коюнде фукъаре койлю къорантасында онунджы эвлят оларакъ догъды. 1921 сенесининъ ачлыгъында онынъ ана-бабасы, агъасы ве енгеси олелер. Абселямны Акъмесджиттеки Мустафа Субхи адына балалар эвине берелер. 1923 сенеси бу ерде тербиеленген балалардан бир группасыны Кезлев районындаки Къаратобе кою хозяйствосы зираатчылыкъ мектебине окъумагъа ёллайлар. 1927 сенеси исе Симферопольдеки оджалар-икътисадият факультетине окъумагъа кире ве оларны да мувафакъиетнен битирип, аспирантурагъа кире.

1935 сенесинден башлап о Акъмесджиттеки Фрунзе адына педагогика институтында кой хозяйствосы мектебинде сиясий-икътисадий дерс бере, газета-журналларда чалыша («Енъи дюнья» газетасыныъ хадими, «Козьайдын» журналынынъ муаррири, «Къызыл Къырым» газетасында болюк мудири).

1939 сенеси Абселям агъа ордугъа мобилизлене. О башта Къачы авиация мектебинде, сонъра Павлоград ве Челябинсктеки авиация мектеплеринде оджалыкъ япа, курсантларгъа социаль икътисадияттан дерс бере.

Улу Ватан дженки башлангъанынен оны Баш сиясий идаре узурындаки бирлешме сиясий ёлбашчыларыны азырлав боюнджа алий курскъа окъумагъа ёллайлар. Оны битиргенинен Дженюбий-гъарбий фронттаки 220-нджи къырыджы авиация дивизиясынынъ сиясий болюк башына ярдымджы этип тайинлене. А. Ислямов бу дивизияда дженкнинъ сонъуна къадар хызмет эте. Аскерлернен бирликте сонъ дередже агъыр олгъан дженк ёлларыны басып кече.

1946 сенеси майор рутбесинде истифагъа чыкъты ве бутюн халкъы сюргюнликте булунгъан Озьбекистанда чешит вазифелерде чалышты. 1957 сенеси Ташкентте къырымтатар тилинде газета тешкилятландырылгъанда оны шу неширге муаррир этип тайинледилер. Эбет бу иш Абселям агъа ичюн янъылыкъ дегиль эди…

… А. Ислямов «Ленин байрагъы»на муаррирлик этип тайинленди ве газетаны чыкъарувгъа азырлыкъ корюльди. О, озь этрафына дженктен эвельки журналистлеримизни ве языджыларымызны джыйды ве ишке киришильди. Аз дегиль, чокъ дегиль, черик асыр Абселям агъа шу газетанынъ коллективине етекчилик япты.

Улу Ватан дженкиндеки ярарлыкълары ве дженктен сонъки йыллардаки исрарлы эмеги ичюн Абселям агъа эки «Къызыл Йылдыз», биринджи ве экинджи дереджели Ватан дженки, «Урьмет Бельгиси» орденлеринен, дёрт кере Озьбекистан Юкъары Совети Президиумынынъ Фахрий ярлыгъынен ве, ниает, «Озьбекистанда нам къазангъан медениет хадими» унванынен такъдирленди.

А. Велиев

 

Абселям Ислямов 1 декабрь куню 1995 сенеси Ташкентте вефат этти.

——————————————————————–