Окъумагъа теклиф этемиз: Къыш (Предлагаем почитать: Зима)

Эр бир йыл мевсимининъ озь невбети бар. Къыш кузьден сонъ келе, къарнен, сувукънен, аязнен кече. Эвлерни, тереклерни бем-беяз къар къаплай. Балалар бойле аваны пек бегенелер, олар къар топынен ойнайлар, аязбабаны ясайлар, чана таялар.

Урьметли балачыкълар, биз сизге къыш акъкъында шиирлерни такъдим этемиз.

Къыш келе

Гедже узай, кунь къыскъара,
Сувукъ арта, юкселе.
Артыкъ энди агъыр-сабыр
Акъ сакъаллы къыш келе.

Гедже-куньдюз ягъмур ягъа,
Ёлдан, ыздан кечильмей.
Чырай сыта куськюн ава,
Кокте йылдыз сечильмей.

Къонур чёльде ашлыкъ чалгъан
Чалгъы, сабан сеси ёкъ.
Къышламагъа бизде къалган
Кушчыкъларнынъ эси ёкъ.

Къапу къакъа торс декабрь,
Тышта сувукъ юкселе.
Артыкъ энди агъыр-сабыр,
Акъ сакъаллы къыш келе.

Эшреф Шемьи-заде

Къыш ве балалар

Багъ-багъча, чёллерде
Ятмакъта терен къар!
Бу сувукъ куньлерде
Къушларгъа омюр тар!
Къаргъалар, торгъайлар
Ем излеп кезмекте.
Къызчыкълар, огъланлар
Къыштан зевкъ сезмекте.
Олар эеджанлы,
Козьлери чокъ джанлы!
Оларда къуванч бар,
Оларда ишанч бар.
Чаналар устюнде
Сызгъырып кетмеге!
Бир-бирининъ артындан
Къувалап етмеге!…

Юнус Темиркъая

Къыш кельди

Япалакъ-япалакъ къар ягъа,
Ап-акъ къырлар…
Не де гузель къыш кельди
Бизим койге.

Къыш сефасы чевреде –
Шенълик, йырлар…
Къарбабаны беклейлер
Эр бир эвде.

Шевкетчик де эр кимдай
Къувнакъ бугунь
Эв артында, байырда
Тая чана.

Ушип келир огълум деп,
Одун ташлап,
Эв къыздыра
Собаны якъып ана.

Билял Мамбет

Къыш зевкъы

Къар япалакълана,
Сокъакълар беязлана.
Топланайыкъ тёгерек
Бизге рушенлик керек.

Къар япалакълана,
Къушчыкълар да сакълана,
Сокъакъларны курейик,
Къушларгъа ем берейик.

Къар япалакълана,
Балачыкълар зевкълана,
Къар бораны уфюрте,
Аяз бизни секирте.

Къар япалакълана,
Къар оюны башлана.
Къыш бабамыз хошлана,
Тап козьлери яшлана.

Зейнеп Аббасова

Къарбаба

Керчектен де къыш кельди,
Къар ята оба-оба…
Къаргъа къаравул къойдыкъ –
Балабан бир Къарбаба!
Къырымнынъ серт еллери
Гедже увулдамасын,
Кийсеттик онъа къалпакъ –
Таз башы бузламасын!
Эки комюр парчасы –
Кёрум деп, агъламасын.
Сим-сия эки козю –
Козьлери бузламасын!
Куннинъ серс вакъытында
Сюмюклери акъмасын.
Буруны – къызыл хавуч,
Буруны бузламасын!
Къарбаба бекчиликте.
Чалышсын, эринмесин…
Бердик къолуна таякъ –
Баарьге ёл бермесин!

Нузет Умеров

Биринджи къар

Юреклерни къувандырып,
Ягъа токътамай къарлар.
Эп бу къаргъа къуваналар
Багъча, тарла, къыр, дагълар.
Кобелекдай уча олар,
Къона истеген ере.
Авучынъа алсанъ, ирий,
Незакетли, эм эрке.
Ягъа, ягъа пек терен къар,
Севинемиз эпимиз.
Сагъламлыкъкъа реин деймиз,
Котериле кейфимиз.

Адхат Сеногъул

Къышбабаны беклеп

Къашкъыр киби улуй къышта
Къар боранлы аджджы ель.
Тек къышбабай къоркъмай ондан
Долана о бувып бель.
Долана о эль-юртларны,
О кирмеген эв ёкътыр.
Бакъып чыкъса джап-сыртларны,
Оны беклеген чокътыр.
О эм куньдюз, эм де гедже
Кезип юре, юкъламай.
Къышбабачюн къыш эглендже –
Къар уфюрте токътамай.

Шакир Селим

Гафарова М. – библиограф 1-й категории
информационно-библиографического отдела
ГБУК РК «Республиканская крымскотатарская
библиотека им. И. Гаспринского