Выдержки из дневника Сабрие Эреджеповой о начале войны
12 июля исполнилось 105 лет со дня рождения певицы, Заслуженной артистки КрымАССР и Узбекистана Сабрие Эреджеповой (1912 – 1977).
Предлагаем выдержки из дневника Сабрие Эреджеповой о начале войны. Её воспоминания, страх и рухнувшие надежды на светлое будущее.
Бизлер, дюньянынъ энъ бахтияр адамлары олып, ана топрагъымызда санатымызны энъ юксек дереджеге котермек, оны бутюн мемлекетке танытмакъ имкяны догъгъан бир девирде къан ичиджи вахший фашист джеллятлары Улу Ватанымызгъа эль узаттылар…
Дженк … Бу сёз дюньянынъ анги еринде олса олсын, инсаннынъ мийини бузлатмайып, юрегини сызлатмайып, вуджудыны титретмейип айтылмай. Дженк сёзюнинъ дешетини, манасыны биринджи джиан муаребесининъ зорлукъларыны, ватандашлар дженкининъ фелякетини корьген ве бильгенлер де, даа дженк не олгъаныны бильмеген яшлыкъ да яхшы анълай эдилер. Лякин XX асырнынъ айдутлары эсап этильген фашизм иле дженк этмекнинъ не демек олгъаныны о вакъытта даа тасавур этмек биле мумкюн дегиль эди.
Июнь 22. Мен, ничюндир, пек эрте уяндым. Пенджере артында аджайып яз таны. Саарь ельчиги беденимни салкъынлаткъан киби олды. Софанынъ перделери, гуя бири-биринен сырдашкъан киби, тосат-тосат ельпиреп алалар. Омюр саниелерини токътатмадан саймакъта олгъан токъмакълы дивар саатына козь ташладым – беш! Къалкъмакъ ичюн пек эрте. Бугунь радиода меним сымарыш концертим бар, анда динълейиджилернинъ энъ зияде севип сымарлагъан йырларыны йырлайджагъым.
Кене юкъугъа кетмеге башлагъанда къапым къакъылгъан киби олды. Мен динълеп бакътым. Къапы текрар къакъылды. Къулагъыма бирден , таныш бир достымыз, арбий доктор Костянынъ сеси кельди.
– Къоркъма, Сабрие, озюнъни тут, гъалиба дженк башланды… манъа шимди телефоннен айттылар, немсе самолетлары янчыкъ Акъярны бомбалагъанлар. Мен сизнен сагълыкълашмагъа кельдим.
– Костя, айтчы манъа, бу хайырсыз, фаджиалы хаберни санъа ким айтты? Ёкъса сен янълыш эшиттинъми? – дедим.
Ай-ай, янълыш олса эди, меним шу дакъикъадан сонъки омюрим, халкъымызнынъ исе бутюн такъдири бойле аст-устине чевирильмез эди … Ёкъ, бу ич кимсенинъ хатирини саймагъан къара акъикъат эди.
Смотреть скан-копию оригинального письма
