Эдипнинъ хатырасына
Март 27-де И. Гаспринский адына джумхуриет къырымтатар кутюпханесинде «Ильхам» эдебий бирлешмесининъ кенишлетильген топлашувы олып кечти. Бу сефер топлашув белли языджы ве терджиман Эмиль Амитнинъ (1938-2002) юбилейине багъышланды. Тедбирни алып баргъан шаир Шерьян Али Эмиль Амитнинъ аяты ве иджадий фаалиети акъкъында чыкъыш япты. Эмиль Амитни шахсен бильген къалемдешлерден Риза Фазыл, Урие Эдемова, Закир Къуртнезир, Иса Абдураман, Айше Кокиева, Исмаил Керимов Эмиль Амитнинъ эсерлери, эсерлеринде акс эттирильген мевзулар хусусында айттылар.
— «Учурымлы ёл» (1971 е.), «Севгиден кучьлю» (1973 е.), «Буюк арзунен» (1978 е.), «Сыгъын чокърагьы» (1982 е.), «Ишанч» (1986 с.) ве дигер китапларнынъ муэллифи Эмиль Амит Москвада M. Горький адына эдебият институтыны битирди. О эм кучьлю несирджи, эм де истидатлы терджиман эди. Теэссюф ки, о арамыздан вакъытсыз кетти. Эмиль Амит киби алчакъгонъюлли, мерхаметли ве къабилиетли инсанны халкъымыз унутмамакъ керек, — деди Шерьян Али.Тедбирде Эмиль Амитнен багълы хатырлавларынен миллий арекет иштиракчиси Арсен Альчиков да чыкъыш япты.— Сюргюнликте Эрвин Умеровнынъ «Къара поездлер», Эмиль Амитнинъ «Денъиз ташчыкълары» адпы эсерлери халкъ арасында пек белли олып, эсерлернинъ распечаткасы къол-къолдан юрген эди. Эльбет, Эмиль Амит озь эсерлерини русча язгъан олса да, онынъ эсерлери Ватангъа севги ашлай, башкъа миллетлерге де фаджиамызны анълата эди. Онынъ эсерлери янъыдан китап оларакъ чыкъарылса яхшы олур эди, — деди Арсен Альчиков.Кутюпхане мудирининъ муавини Лейля Къадырова Эмиль Амитке багъышлангъан китаплар сергисини такъдим этти. Тедбирде халкъымызнынъ севимли йырджысы Рустем Меметов халкъ йырларыны иджра этти.
С. СЕЙРАН
//Янъы дюнья.-2013.-№12(1187).-с.1