Китапхане А. Султаннынъ эшья ве ресимлеринен зенгинлешти

1-октябрьде И. Гаспринский адына миллий китапханемизде Советлер Бирлигининъ Эки дефа Къараманы, учуджы-сынавджы Аметхан Султаннынъ эки сой къардашы Сервер Насибуллаев Аметханнынъ омюри ве фаалиетинен багьлы къыйметли мальземелерни такъдим этти.С.Насибуллаев китапханеге Москвадаки Къырым джемиетининъ реиси Мустафа Мухтеремнен берабер кельди. Аметхан Султаннен багьлы шейлерни китапханеге багъышламакъ фикирини Сервер агъагъа Мустафа бей айткъан ве олар китапханенен багьлангьанлар.Бойлеликнен, Аметхан Султаннынъ, онынъ сойларынынъ ресимлери, Аметхан Султан озь къолунен язгъан шиир, Аметхангъа 1962 сенеси досту багьышлагьан фотоаппарат, анасынынъ ве Аметханнынъ портрети, 1970 сенеси юбилей вакъытында алынгъан видеотасмаларны багъышлады.Бу шейлернинъ арасында Аметхан Султан акъкъында макъалелер язылгъан 1990 сенеси чыкъкъан «Правда», «Советский Крым», 1991 сенеси чыкъкъан «Ленинец» ве дигер газетлер бар.Сервер агьа чыкъышында ресимлер акъкъында икяе этти, оларнынъ тарихынен багьлы малюматларны айтты ве, джумледен, бойле деди: -Бу ресимлерни омюр аркъадашымнен берабер йигирми йыл девамында топладым. Эльбетте, эвимде альбом ичинде турса, бу къыйметли шейлерни менден башкъа кимсе бильмезАметхан халкъымызнынъ шанлы йигитидир. Шу себептен менде олгъан онынънен багьлы шейлер халкъымыз вариетине чевирильсин, дедим.Акъмесджит демирёл окъув юртунда Аметхан Султангъа багъышлангьан стенд бар. Мен анда Аметханнынъ омюри ве фаалиетинен багьлы баягъы ресимлерни берген эдим. Меракълангъанлар барып бакъа билелер.Тедбирнинъ сонъунда китапхане мудирининъ муавини Лейля Къадырова китапхане фондуны къыйметли фото ве газетлернен зенгинлештиргени ичюн Сервер Насибуллаевге тешеккюр бильдирди. Сервер агьа ве Мустафа бейге хатыра ичюн библиотека корюнюши тасвирленген шарф багъышлады.

 

Наджие АМЕТОВА

// Qırım. 2013 с.-5 октября,.- с. 2