Балаларгъа баарь акъкъында шиирлер

В рамках проводимой библиотекой “Недели детской и юношеской книги” информационно-библиографический отдел предлагает вашему вниманию стихи о весне на русском и крымскотатарском языках для детей дошкольного и младшего школьного возраста.

Къыш кечти – баарь кельди.
Къушлар сыджакъ улькелерден къайттылар.
Орман ве дагълар,  багъ-багъчалар ешерди.
Урьметли балачыкълар, биз сизге баарь
акъкъында шиирлерни такъдим этемиз.

Баарь ягъмуры

Кок юзю булутланды,
Ерге ягъмур тамчылай.
Булутлар эп алчакъланды,
Кок гудюрдей-шатырдай.
Козьлеринъни  къамаштыра
Чакъмакъ чакъкъан йылдырым,
Ильни не де яраштыра,
Дейим : «Ягъ, ягъ, ягъмурым!»
Ягъмур ягъса багъчаларгъа,
Тогъайларгъа, чёллерге,
Бинъ тешеккюр айтамыз биз
Бол ягъмурлы баарьге.

Энвер КЪАФАДАР

Баарь кельгенин дуям

Сабадан берли ягъмур
Токътамадан эп ягъа,
Баарь кельди, тарлаларда
Номай сувнен тойдура.
Ешиль тюсте, макъат киби,
Чёллер, Къырым багълары,
Узакъларгъа козь ташласанъ,
Санки дженнет кошеси!
Къушчыкъларнынъ сеслеринден
Эр кунь саба уянам,
Гузель бульбуль йырларындан
Баарь кельгенин дуям!

Экрем ГЪАФАРОВ

Мевсим баарь

Ешилленди небататлар,
Озенлер «шыр-шыр» акъар.
Инсан, айван, къурт-къарынджа,
Эр кес ишини бакъар.

Баарь киби мевсим олмаз,
Ферахнаныр юреклер.
Къыдыр-Ильяс куньлеричюн,
Пиширирлер чёреклер.

Сабанджылар чёльде энди,
Топрагъы аль этелер.
Акъшам олса топлашаракъ,
Йырлай, йырлай кетелер.

Сызгъыртыр чобан дюдюги,
Къой-къозулар мелерлер.
Отькюр сесли бульбульчиклер
Юреклерни делерлер.

Якъуб ШАКИР-АЛИ

Мен бир баарь ельчигим

Мен бир баарь ельчигим,
Хоштан-хош гонъюльчигим.
Юреклерге зевкъ берем,
Юзьни сыйпар эльчигим.

Гуль-чечекнинъ янагъын
Опе назик дудагъым,
Балаларнынъ юзюни
Сыйпамакътыр мурадым.

Зейтулла АЛБАТЛЫ

Баарь мевсими

Ах, не къадар гузель мевсим
Тереклер гуль ачкъанда.
Къайтып кельген йырджы къушлар
Сюрюлернен учкъанда.

Ачыкъ-мавы кок юзюнде,
Нурлу кунеш ышыгъы.
Оз-озюне бу манзара –
Табиат ярашыгъы.

Джыллы, хафиф ельчик эссе,
Бу – баарнинъ нефеси.
Табиатны безендире –
Бульбулллернинъ хош сеси.

Эрдживан КЕРМЕНЧИКЛИ

Акъбардакъ

Къыза топракъ баарьде,
Чыкъа акъбардакъ ерден.
Кунеш нурларын сача,
Акбардакъ юзюн ача.

Ап-акъ, назик, чечечик,
Ортасында дёгмечик,
Не ичюндир о, ерге
Беяз башышы эге.

Эльмаз  ЮНУСОВА

Яша, къуван!

Къарылгъач кельди,
Баарь кельди.
Эвимиз кульди,
Шадландыкъ.
Къарылгъач кельди,
Селям кельди,
Баарьлик ишке
Атландыкъ.
Ювачыгъынъ,
Сен кельгендже
Сакъладыкъ биз,
Къарылгъач!
Яша, къуван,
Кузь кельгендже,
Сонъ ёлунъа Къанат ач.

Субхи ВАПИЕВ