Исмаил Гаспринский адына къырымтатар джумхуриет кутюпханеси

12-ноябрьде мезкюр китапханенинъ «Дружба народов» болюгинде шаир Шакир Селимнинъ хатырасына багъышлангъан тедбир олып кечти.Мерасимде филология илимлери докторы, профессор, ТМУ украин эдебияты тарихы кафедрасынынъ мудири Виктор Гуменюк, КъМПУ филология илимлери докторы, профессор Исмаил Керимов, шаир ве мизахчы Аблязиз Велиев, шаир, несирджи, эдебиятшынас Риза Фазыл, КъМПУ къырымтатар ве тюрк филологиясы кафедрасынынъ доценти Фера Сеферова, КъМПУ къырымтатар ве тюрк филологиясы кафедрасынынъ мудири Ленияр Селимова «Къырым»  газетининъ баш муаррири ве КъМПУ къырымтатар ве тюрк филологиясы кафедрасынынъ доценти Бекир Мамутов, журналист Эмир Аблязов, эм де Къырым алий окъув юртларынынъ студентлери, Къырым джумхуриет дипломдан сонъ тасильни юксельтюв институтынынъ динълейиджилери, матбуат хадимлери, И. Гаспринский адына китапхане хадимлери иштирак эттилер.Тедбирни китапхане «Дружба народов» болюгининъ баш библиографы Людмила Алферова ачты ве шаир, терджиман, публицист Шакир Селимнинъ дердж олунгъан эсерлери кирсетильген къылавузны насыл этип азырлагьаны, бу малюматларны алмакъ ичюн насыл ишлер япылгьаны акъкъында икяе этти, эм де шаир акъкъында малюмат берди.В. Гуменюк, И. Керимов, А. Велиев, Р. Фазыл, Ф. Сеферова, Б. Мамутовнынъ хатырлавларында истидатлы сёз устасы, догъмуш эдебиятыны терен бильген эдебий тенкъитчи, самимий ве акъикъатпервер инсан, шакъаджы, озь ватаныны ве халкъыны сынъырсыз севген Шакир агъанынъ образы джанланды.Ш. Селимнинъ фаалиети ве иджады яшлар ичюн нумюне оладжагъы акъкъында айтылды. Ленияр Селимова озь бабасы акъкъында бойле деди: «Он был яркой личностью, он был поэтом-провидцем, тонко чувствовавшим предстоящее, в этом была его сила. Его любили люди, все свои силы, до последнего дыхания он отдал делу сохранения, возрождения, развития национальной литературы и культуры».Болюк хадимлери тедбирге кельгенлерни Шакир Селимнинъ омюр басамакъларыны акс эткен малюматларнен таныш эттилер ве «Открой, перо, мне тайну мирозданья и освети тернистый путь…»адлы кениш серги азырладылар.Тедбирде «Шакир Селим» библиографик къылавузы къырымтатар эдебиятынынъ инкишафында студентлерге, оджаларгьа шаир, терджиман, публицист Шакир Селимнинъ аяты ве иджады акъкъында малюмат тапмагъа буюк ярдымы тиеджеги акъкъында айттылар.Тедбирнинъ сонъунда Ленияр ве Арзы Селимовалар бабаларынынъ хатырасыны сакълап къалувда япкъан ишлери ичюн тешкилятчыларгъа аилелери адындан тешеккюр бильдирдилер.«Къырым» девлет телерадио компаниясы азырлагъан «Шакир Селим» адлы весикъалы фильм эр кес ичюн меракълы олды.

Озь мухбиримиз.

//Qırım – 2013.- ноябрь – 16 с. 2