Информационно-библиографический отдел библиотеки им. И. Гаспринского ко Дню матери подготовил подборку стихотворений для детей.

Ана акъкъында шиирлер

Ана – энъ азиз инсан

Ана – эвнинъ чырагъы,
Онынъ сёнмез оджагъы.
Софраларнынъ боллугъы,
Эвлятларнынъ токълугъы.

Ана – Юртнынъ диреги,
Инсанларнынъ мелеги.
Чечеклернинъ къокъусы,
Дженнетнинъ хош къапусы.

Ана – кунешнинъ нуру,
Озенлернинъ копюри.
Денъизлернинъ ялысы,
Саба о, танъ йылдызы.

Ана – бу раатлыкъ, къуванч,
Агъыр куньге о таянч.
Инсанларнынъ ильк сёзю,
Тебессюм сачкъан козю.

Ана – бу тынчлыкъ эви,
Битмез, тюкенмез севги.
Гедженинъ айненеси,
Татлы, шифалы сеси.

Ана – аят бахтлыгъы,
Къорантанынъ байлыгъы.
Мейваларнынъ шырасы,
Мерхаметлик дерьясы.

Сейран Ибраим

Ана, аначыгъым

Ана, аначыгъым,
Азизим анам.
Сени шенъ корьгенде
Мен де къуванам.

Черенъде тебессюм
Олсун эбедий.
Анадыр дюньянынъ
Джеми эмеди.

Ана юзю кульсе
Дюнья шад ола.
Ана кедерленсе
Чечеклер сола.

Балам, балачыгъым…
Бу ана сёзю.
Гедже-куньдюз сенде
Ананынъ козю.

Янар, йыкъылыр о
Эвляды ичюн.
Анадан азиз шей
Ёкъ бизлер ичюн.

Ана, аначыгъым…
Бу эвлят сёзю.
Ананы айбетле,
Ана – Ер юзю.

Дюньягъа бергисиз
Онынъ севгиси.
Аналар огюнде
Дюнья эгильсин.

                      Аблязиз Велиев

Ана

Джанымдан азизим, козюмде нурум,
Эр шейден къыйметли, севимли анам!
Бахтым, къуванчым, къальбимде сырым,
Гуль багъым, баарим – севимли ана!

Сабийлик чагъымнынъ саари – ана,
Осьмюрлик девримнинъ баари – ана,
Умюдим, хаялым багълыдыр санъа,
Омрюмнинъ гъонджеси – севимли ана.

Геджеде юкъунъны он кере больгенсинъ,
Ойнасам – севинип, мен кульсем – кульгенсинъ,
Кейфимни бозгъанда, сарарып солгъансынъ,
Дердимнинъ девасы – севимли ана.

Сёзлеринъ денъизге, дерьягъа сыгъмаз,
Сен ичюн ачылгъан гуллер ич солмаз.
Дестанлар язсам да, эллерим талмаз,
Гонълюмни охшагъан севимли ана.

                                 Джеваире Меджитова

Ах, анам, аначыгъым

Меним гузель чечегим –
Ах, анам, аначыгъы,
Мис киби къокъу сачар,
Манъа къучагъын ачар.

Эгер янына барсам,
Бойнуна мен сарылсам,
Янагъындан опеджем,
«Ах, анам», деп севеджем!    

                                Эмине Усеин

Гузель анам

Гузель анам, сени мен
Джаным къадар северим.
Сен меним бир данемсинъ,
Эллеринъни оперим.

Ичимдеки севгини
Ич бир шейден ольчемем.
Бу севги – сенинъ севгинъ,
Дюньягъа денъиштирмем.

                      Керим Джамананълы